వాల్మీకిపురం వద్ద ఆర్టీసీ బస్సు బోల్తా.. 20 మందికి గాయాలు

రాజనీతి | వాల్మీకిపురం | అన్నమయ్య జిల్లా:
ప్రయాణికులతో వెళ్తున్న ఆర్టీసీ బస్సు ఒక్కసారిగా అదుపుతప్పి బోల్తా పడటంతో అన్నమయ్య జిల్లాలో కలకలం రేగింది. వాల్మీకిపురం సమీపంలో జరిగిన ఈ ఘటనలో డ్రైవర్‌తో పాటు సుమారు 20 మంది ప్రయాణికులకు స్వల్ప గాయాలయ్యాయి. అయితే ప్రమాద తీవ్రత ఎక్కువగా ఉండటంతో ప్రాణనష్టం జరుగుతుందేమోనన్న ఆందోళన నెలకొంది. అదృష్టవశాత్తూ ఎలాంటి ప్రాణనష్టం జరగలేదు.

అదుపుతప్పిన బస్సు.. ఒక్కసారిగా బోల్తా

వాల్మీకిపురం సమీపంలో ప్రయాణిస్తున్న సమయంలో డ్రైవర్ బస్సుపై నియంత్రణ కోల్పోయినట్లు సమాచారం. దీంతో బస్సు రోడ్డు పక్కకు దూసుకెళ్లి బోల్తా పడింది. ప్రమాద సమయంలో బస్సులో పలువురు ప్రయాణికులు ఉండటంతో ఒక్కసారిగా భయాందోళనలు నెలకొన్నాయి.

స్థానికులే ముందుగా స్పందించారు.అదుపుతప్పి రోడ్డు పక్కకు దూసుకెళ్లిన బస్సు.. స్థానికుల చొరవతో ప్రయాణికుల రక్షణ.

ప్రమాదాన్ని గమనించిన స్థానికులు, అటుగా వెళ్తున్న వాహనదారులు వెంటనే అక్కడికి చేరుకున్నారు. బోల్తా పడిన బస్సులో చిక్కుకున్న ప్రయాణికులను బయటకు తీసేందుకు సహాయక చర్యలు చేపట్టారు. బస్సు అద్దాలను తొలగించి ప్రయాణికులను సురక్షితంగా బయటకు తీసుకొచ్చారు.

20 మందికి స్వల్ప గాయాలు

ఈ ఘటనలో డ్రైవర్‌తో పాటు సుమారు 20 మంది ప్రయాణికులకు గాయాలయ్యాయి. క్షతగాత్రులను సమీపంలోని ప్రభుత్వ ఆసుపత్రికి తరలించి వైద్య చికిత్స అందించారు. ప్రస్తుతం వారందరి పరిస్థితి సురక్షితంగా ఉందని వైద్యులు తెలిపారు. 

ట్రాఫిక్‌కు అంతరాయం

ప్రమాదం కారణంగా బస్సు రోడ్డుకు అడ్డంగా పడటంతో కొంతసేపు వాహనాల రాకపోకలకు అంతరాయం ఏర్పడింది. పోలీసులు సంఘటనా స్థలానికి చేరుకుని పరిస్థితిని పరిశీలించారు. క్రేన్‌ సహాయంతో బస్సును పక్కకు తొలగించి రాకపోకలను పునరుద్ధరించారు. ఘటనపై పోలీసులు దర్యాప్తు చేపట్టారు. 

ప్రమాదం తీవ్రత ఎక్కువగా ఉన్నా.. ప్రాణనష్టం లేకపోవడంతో ప్రయాణికులు, వారి కుటుంబ సభ్యులు ఊపిరి పీల్చుకున్నారు.