అన్నమయ్య జిల్లా మదనపల్లెలోని జిల్లా వైద్య మరియు ఆరోగ్య శాఖ కార్యాలయంలో జిల్లా వైద్య మరియు ఆరోగ్య శాఖ అధికారి డా. లక్ష్మి నరసయ్య

ప్రెస్ నోట్
మదనపల్లె, జూలై 28:
అన్నమయ్య జిల్లా మదనపల్లెలోని జిల్లా వైద్య మరియు ఆరోగ్య శాఖ కార్యాలయంలో జిల్లా వైద్య మరియు ఆరోగ్య శాఖ అధికారి డా. లక్ష్మి నరసయ్య అధ్యక్షతన జాయింట్ యాక్షన్ కమిటీ (JAC) సమావేశం మంగళవారం నిర్వహించబడింది. వర్షాకాలంలో ప్రజారోగ్య పరిరక్షణ, సీజనల్ వ్యాధుల నివారణ, అంతర్‌శాఖల సమన్వయంపై ఈ సమావేశంలో విస్తృతంగా చర్చించారు.
ఈ సమావేశానికి జిల్లా వైద్య మరియు ఆరోగ్య శాఖ, మహిళా మరియు శిశు సంక్షేమ శాఖ (ICDS), పశుసంవర్ధక శాఖ, విద్యాశాఖ, ఫుడ్ సేఫ్టీ శాఖ, గ్రామీణ నీటి సరఫరా (RWS), మున్సిపల్ శాఖ, వ్యవసాయ శాఖ, పంచాయతీ రాజ్ శాఖల అధికారులు హాజరయ్యారు.
ఈ సందర్భంగా డా. లక్ష్మి నరసయ్య మాట్లాడుతూ, వర్షాకాలంలో డెంగ్యూ, చికున్‌గున్యా, మలేరియా, వైరల్ జ్వరాలు వంటి సీజనల్ వ్యాధులను అరికట్టేందుకు అన్ని శాఖలు సమన్వయంతో పనిచేయాలని సూచించారు. గ్రామాలు, పట్టణాల్లో పరిశుభ్రతను మెరుగుపరచడం, నీరు నిల్వ ఉండే ప్రదేశాలను తొలగించడం, దోమల నివారణ చర్యలు, ఫాగింగ్, యాంటీ లార్వల్ కార్యక్రమాలను వేగవంతం చేయాలని అధికారులను ఆదేశించారు.
ప్రజలకు సురక్షితమైన తాగునీరు అందుబాటులో ఉండేలా చర్యలు తీసుకోవడంతో పాటు పాఠశాలలు, అంగన్‌వాడీ కేంద్రాలు, ఆరోగ్య సంస్థల్లో పరిశుభ్రతను తప్పనిసరిగా పాటించేలా చర్యలు చేపట్టాలని సూచించారు. వ్యక్తిగత పరిశుభ్రత, వ్యాధుల లక్షణాలు, ముందస్తు జాగ్రత్తలపై ప్రజల్లో విస్తృత అవగాహన కార్యక్రమాలు నిర్వహించాలని తెలిపారు.
అదేవిధంగా గ్రామాలు, పట్టణాల్లో జ్వరాల పర్యవేక్షణను మరింత బలోపేతం చేసి, అనుమానిత కేసులను వెంటనే గుర్తించి వైద్య పరీక్షలు నిర్వహించి, అవసరమైన చికిత్స అందించాలని సంబంధిత శాఖలకు ఆదేశించారు. ప్రతి శాఖ తమకు అప్పగించిన బాధ్యతలను నిర్ణీత సమయంలో పూర్తి చేసి, చేపట్టిన చర్యలపై క్రమం తప్పకుండా నివేదికలు సమర్పించాలని పేర్కొన్నారు.
అంతర్‌శాఖల సమన్వయంతో సమర్థవంతంగా పనిచేస్తే ప్రజారోగ్య సమస్యలను అధిగమించి, సీజనల్ వ్యాధుల వ్యాప్తిని సమర్థవంతంగా నియంత్రించవచ్చని జిల్లా వైద్య మరియు ఆరోగ్య శాఖ అధికారి డా. లక్ష్మి నరసయ్య తెలిపారు.
ఈ సమావేశంలో జిల్లా నోడల్ అధికారి డా. శ్రీధర్, జిల్లా మలేరియా అధికారి డా. రామచంద్ర రెడ్డి, వివిధ శాఖల అధికారులు మరియు జిల్లా వైద్య మరియు ఆరోగ్య శాఖ కార్యాలయ సిబ్బంది పాల్గొన్నారు.