నవ్వుల వెనుక రహస్యం..! ‘ఆదర్శ కుటుంబం’లో వెంకటేష్ అసలు కథ ఇదేనా?

హైదరాబాద్: విక్టరీ వెంకటేష్, దర్శకుడు త్రివిక్రమ్ శ్రీనివాస్ కాంబినేషన్‌లో రూపొందుతున్న ‘ఆదర్శ కుటుంబం హౌస్ నెం: 47 – AK47’ చిత్ర బృందం తాజాగా విడుదల చేసిన గ్లింప్స్ ప్రేక్షకుల్లో ఆసక్తిని పెంచుతోంది. ఇందులో వెంకటేష్ పోషిస్తున్న ‘చిట్టిబాబు’ పాత్రను మొదటిసారిగా పరిచయం చేస్తూ విడుదల చేసిన వీడియో సోషల్ మీడియాలో వైరల్ అవుతోంది.

గ్లింప్స్‌లో చిట్టిబాబు కుటుంబ బాధ్యతలను స్వయంగా చూసుకునే వ్యక్తిగా కనిపిస్తాడు. ఇంటి పనులు చేయడంలో ఎలాంటి సంకోచం లేకుండా వ్యవహరించే ఆయన పాత్ర చుట్టూ హాస్యభరిత సన్నివేశాలు కనిపిస్తాయి. అయితే చివర్లో కుటుంబ సభ్యులు రక్తపు మరకలతో కనిపించే షాట్ కథలో మరో కోణం దాగి ఉందనే ఉత్కంఠను పెంచింది. సాధారణ కుటుంబ కథగా మొదలై అనూహ్య మలుపులు ఉండొచ్చనే సంకేతాలను చిత్రబృందం ఇచ్చింది.

ఈ చిత్రంలో వెంకటేష్ సరసన శ్రీనిధి శెట్టి కథానాయికగా నటిస్తుండగా, నారా రోహిత్ కీలక పాత్ర పోషిస్తున్నారు. హారికా అండ్ హాసినీ క్రియేషన్స్ నిర్మిస్తున్న ఈ చిత్రానికి ఎస్. థమన్ సంగీతం అందిస్తున్నారు.

త్రివిక్రమ్–వెంకటేష్ కలయికలో వస్తున్న తొలి చిత్రం కావడంతో అభిమానుల్లో భారీ అంచనాలు నెలకొన్నాయి. కుటుంబ వినోదంతో పాటు థ్రిల్లింగ్ అంశాలను మేళవించిన కథతో ఈ చిత్రం ప్రేక్షకులను ఆకట్టుకుంటుందని సినీ వర్గాలు భావిస్తున్నాయి. ప్రస్తుతం చిత్రీకరణ కొనసాగుతుండగా, గాంధీ జయంతి సందర్భంగా అక్టోబర్ 2న విడుదల చేయాలని నిర్మాతలు లక్ష్యంగా పెట్టుకున్నారు.