రేణిగుంటలో డ్రగ్స్ ముఠా గుట్టురట్టు 62 గ్రాముల ఎండీఎంఏ సింథటిక్ డ్రగ్స్ స్వాధీనం – ముగ్గురు అరెస్ట్

రేణిగుంట, జూలై 10 (రాజనీతి): తిరుపతి జిల్లాలో మాదకద్రవ్యాల నిర్మూలనకు పోలీసులు చేపట్టిన ప్రత్యేక కార్యాచరణలో మరో కీలక విజయం సాధించారు. యువతను లక్ష్యంగా చేసుకుని అత్యంత ప్రమాదకరమైన ఎండీఎంఏ సింథటిక్ డ్రగ్స్‌ను విక్రయిస్తున్న ముఠాను రేణిగుంట అర్బన్ పోలీసులు ఛేదించారు. విశ్వసనీయ సమాచారం ఆధారంగా నిర్వహించిన మెరుపు దాడుల్లో ముగ్గురు నిందితులను అరెస్టు చేసి, వారి వద్ద నుంచి 62 గ్రాముల ఎండీఎంఏ డ్రగ్స్, నాలుగు సెల్‌ఫోన్లు, రెండు డిజిటల్ వెయింగ్ మిషన్లు, రెండు రాయల్ ఎన్‌ఫీల్డ్ మోటార్‌సైకిళ్లను స్వాధీనం చేసుకున్నారు. ఈ కేసుకు సంబంధించిన పూర్తి వివరాలను శుక్రవారం రేణిగుంట అర్బన్ పోలీస్ స్టేషన్‌లో ఏర్పాటు చేసిన మీడియా సమావేశంలో డీఎస్పీ వెల్లడించారు. ఈ సందర్భంగా డీఎస్పీ శ్రీనివాసరావు మాట్లాడుతూ జిల్లాలో గంజాయి, సింథటిక్ డ్రగ్స్, ఇతర మాదకద్రవ్యాల నిర్మూలనే లక్ష్యంగా జిల్లా పోలీసు శాఖ ప్రత్యేక కార్యాచరణను అమలు చేస్తోందన్నారు. రాష్ట్ర డీజీపీ మార్గదర్శకాలు, జిల్లా ఎస్పీ సుబ్బారాయుడు ఆదేశాల మేరకు ప్రతి పోలీస్ స్టేషన్ పరిధిలో నిఘాను మరింత కట్టుదిట్టం చేశామని తెలిపారు. ఆ చర్యల్లో భాగంగానే ఈ కేసు వెలుగులోకి వచ్చిందన్నారు. స్వాధీనం చేసుకున్న మాదకద్రవ్యం ఎండీఎంఏ అనే అత్యంత ప్రమాదకరమైన సింథటిక్ సైకోట్రోపిక్ డ్రగ్ అని డీఎస్పీ వివరించారు. దీనిని యువతలో సాధారణంగా ఎక్స్టసీ, మాలీ, ఎక్స్‌టీసీ, మాండీ వంటి పేర్లతో పిలుస్తారని చెప్పారు. గంజాయి కంటే ఎన్నో రెట్లు తీవ్రమైన ప్రభావం చూపే ఈ డ్రగ్‌ను సేవించిన వ్యక్తులు కొంతసేపు భ్రమల్లోకి వెళ్లిపోతారని, లేని వాటిని ఉన్నట్లు భావించడం, మానసిక నియంత్రణ కోల్పోవడం, తీవ్రమైన ఆనందం, భయం వంటి అసహజ భావోద్వేగాలకు లోనవడం, హింసాత్మకంగా ప్రవర్తించడం, గుండె స్పందన పెరగడం, రక్తపోటు అధికమవడం, చివరకు ప్రాణాపాయం కూడా సంభవించే ప్రమాదం ఉందన్నారు. ఇటీవలి కాలంలో పార్టీలు, పబ్‌లు, ప్రైవేట్ సమావేశాలు, యువత సమావేశాల్లో ఇటువంటి డ్రగ్స్ వినియోగం పెరుగుతుండటం ఆందోళన కలిగించే అంశమని తెలిపారు. ఈ కేసులో గుణశేఖర్, అశ్విని కుమార్, రాహుల్ యాదవ్ అనే ముగ్గురు నిందితులను పోలీసులు అరెస్టు చేసినట్లు డీఎస్పీ తెలిపారు. వీరిలో ఒకరు బీటెక్ చదువుతున్న విద్యార్థి కాగా, మిగిలిన ఇద్దరూ తిరుపతిలో నివాసముంటున్నారని చెప్పారు. ప్రాథమిక విచారణలో వీరు కొంతకాలంగా డ్రగ్స్ విక్రయాల్లో పాల్గొంటున్నట్లు గుర్తించినట్లు తెలిపారు. నిందితులు బెంగళూరులోని ఓ ప్రధాన సరఫరాదారు నుంచి ఎండీఎంఏ డ్రగ్స్ కొనుగోలు చేసి తిరుపతికి తీసుకువచ్చి, వాటిని చిన్న చిన్న ప్యాకెట్లుగా తయారు చేసి యువతకు విక్రయిస్తున్నట్లు విచారణలో అంగీకరించినట్లు డీఎస్పీ వెల్లడించారు. డ్రగ్స్‌ను ఖచ్చితమైన బరువుతో ప్యాక్ చేయడానికి రెండు డిజిటల్ వెయింగ్ మిషన్లు ఉపయోగిస్తున్నారని, రవాణా కోసం రెండు రాయల్ ఎన్‌ఫీల్డ్ మోటార్‌సైకిళ్లను వినియోగిస్తున్నట్లు గుర్తించామని చెప్పారు. వీరి వద్ద నుంచి నాలుగు సెల్‌ఫోన్లను కూడా స్వాధీనం చేసుకున్నామని, వాటిలో ఉన్న కాల్ డేటా, వాట్సాప్ చాట్లు, ఆన్‌లైన్ లావాదేవీలు, కాంటాక్ట్ వివరాలను పరిశీలిస్తూ మొత్తం డ్రగ్స్ నెట్‌వర్క్‌ను ఛేదించే దిశగా దర్యాప్తు కొనసాగుతోందన్నారు. బెంగళూరులో ఉన్న సరఫరాదారు ఎవరు? అతనికి డ్రగ్స్ ఎక్కడి నుంచి వస్తున్నాయి? రాష్ట్రాల మధ్య పనిచేస్తున్న పెద్ద ముఠాతో సంబంధాలున్నాయా? ఇంకా ఎవరెవరు ఇందులో భాగస్వాములయ్యారు? అనే అంశాలపై లోతైన దర్యాప్తు కొనసాగుతోందని డీఎస్పీ తెలిపారు. ఈ నెట్‌వర్క్‌లో ఉన్న ప్రతి ఒక్కరినీ గుర్తించి చట్టపరంగా కఠిన చర్యలు తీసుకుంటామని స్పష్టం చేశారు. ప్రస్తుతం డ్రగ్స్ వ్యాపారులు ఎక్కువగా కళాశాల విద్యార్థులు, యువ ఉద్యోగులు, నిరుద్యోగ యువకులను లక్ష్యంగా చేసుకుని మాదకద్రవ్యాలు విక్రయిస్తున్నారని తెలిపారు. మొదట ఉచితంగా అలవాటు చేసి, తర్వాత డబ్బులు వసూలు చేస్తూ వారిని పూర్తిగా బానిసలుగా మార్చే ప్రయత్నాలు జరుగుతున్నాయని చెప్పారు. ఒకసారి అలవాటు పడిన తర్వాత యువత చదువు, ఉద్యోగం, కుటుంబ జీవితం, ఆరోగ్యం అన్నీ దెబ్బతింటాయని హెచ్చరించారు. రాష్ట్ర డీజీపీ ఆదేశాల మేరకు ప్రతి పోలీస్ స్టేషన్ పరిధిలో బయో-చెక్ పరీక్షలు నిర్వహిస్తున్నామని తెలిపారు. డ్రగ్స్ వినియోగిస్తున్న అనుమానితులను గుర్తించేందుకు ఆధునిక పద్ధతులను వినియోగిస్తున్నామని చెప్పారు. విద్యాసంస్థలు, హాస్టళ్లు, లాడ్జీలు, కంపెనీలు, హోటళ్లు, అనుమానాస్పద ప్రాంతాలపై నిరంతరం నిఘా కొనసాగుతోందన్నారు. డ్రగ్స్ విక్రయదారులను మాత్రమే కాకుండా వాటికి బానిసైన యువతను కూడా గుర్తిస్తున్నామని తెలిపారు. అటువంటి వారి తల్లిదండ్రులను పిలిపించి ప్రత్యేకంగా కౌన్సెలింగ్ నిర్వహిస్తున్నామని చెప్పారు. అవసరమైతే వారిని తిరుపతిలోని రుయా, స్విమ్స్ ఆసుపత్రుల్లో ఉన్న డీ-అడిక్షన్ కేంద్రాలకు పంపించి వైద్య చికిత్స అందించే చర్యలు తీసుకుంటున్నామని వెల్లడించారు. డ్రగ్స్ వినియోగం ఒక నేరమే కాకుండా తీవ్రమైన ఆరోగ్య సమస్య కూడా అని, అలవాటు పడిన వారు తప్పనిసరిగా చికిత్స పొందాలని సూచించారు. డ్రగ్స్ నిర్మూలనలో ప్రజల సహకారం ఎంతో కీలకమని పేర్కొన్నారు. తమ పరిసర ప్రాంతాల్లో ఎవరైనా డ్రగ్స్ విక్రయిస్తున్నట్లు, నిల్వ చేస్తున్నట్లు, వినియోగిస్తున్నట్లు అనుమానం వచ్చిన వెంటనే పోలీసులకు సమాచారం అందించాలని కోరారు. సమాచారం ఇచ్చిన వారి వివరాలను పూర్తిగా గోప్యంగా ఉంచుతామని హామీ ఇచ్చారు. ముఖ్యంగా తల్లిదండ్రులు తమ పిల్లల ప్రవర్తనలో అకస్మాత్తుగా మార్పులు, రాత్రివేళలు బయట తిరగడం, అధిక ఖర్చులు, ఒంటరిగా ఉండడం, చదువుపై ఆసక్తి తగ్గడం వంటి లక్షణాలు కనిపిస్తే వెంటనే అప్రమత్తమై పోలీసులను, నిపుణులను సంప్రదించాలని సూచించారు. ఈ భారీ డ్రగ్స్ స్వాధీనం ఆపరేషన్‌ను విజయవంతంగా నిర్వహించిన రేణిగుంట అర్బన్ సీఐ జయచంద్ర, ఎస్‌ఐలు ధర్మారెడ్డి, శ్రీనివాసులు, పోలీసు సిబ్బందిని జిల్లా ఎస్పీ ప్రత్యేకంగా అభినందించినట్లు డీఎస్పీ తెలిపారు. డ్రగ్స్ యువత భవిష్యత్తును చీకట్లోకి నెట్టే మహమ్మారి. ఈ మాఫియాను ఎట్టి పరిస్థితుల్లోనూ ఉపేక్షించం. మాదకద్రవ్యాల విక్రయం, రవాణా, వినియోగం చేసే వారిపై కఠిన చట్టపరమైన చర్యలు కొనసాగుతాయి. తిరుపతి జిల్లాను గంజాయి, డ్రగ్స్ రహిత జిల్లాగా తీర్చిదిద్దేందుకు పోలీసు శాఖ సంపూర్ణ నిబద్ధతతో పనిచేస్తోంది. ప్రజలు కూడా పోలీసులకు సహకరిస్తేనే ఈ సామాజిక వ్యాధిని పూర్తిగా నిర్మూలించగలం అని స్పష్టం చేశారు.